Sámi joatkkaskuvla lei doppe goalmmát luohká oahppospesialiseren- ja lasáhusluohká ohppiiguin, oktiibuot ledje 20 oahppi mielde. Álggos lei čoagganeapmi UiT kultursálas, ovdalgo oahppit ieža válljejedje makkár fálaldagaid birra háliidedje eambbo gullat ja oahppat. Mii gearggaimet maiddái finadit buvddaiguin ovdalgo vulggiimet Sámi Siidii, doppe leimmet fárrolagaid Sámi joatkkaskuvlla ja boazodoalloskuvlla ohppiiguin ja oahpaheddjiiguin.
Sámi siiddas lei mis teambuilding ja servvoštalaimet pizzain maŋŋil “Farmen stohkosiid”. Oahpaheaddjit maid besse searvat gilvui, ja min joavkku namma šattai "Mii eat hálit". Sii geat vuite teambuilding gilvvu ledje guokte oahppi Sámi joatkkaskuvllas Kárášjogas ja vihtta oahppi Sámi joatkkaskuvlla ja boazodoalloskuvllas.
Sámi Siida lágidii suohtas stohkosiid, ja guossohii njálgga borramuša. Giitu Sámi Siidii, ja giitu maid Baltos bussii geat vuojihedje min.
